თურქული უპილოტო საფრენი აპარატების მწარმოებელი კომპანია Baykar Makina რუს სამხედროებს არ მიაწვდის თავდასხმის დრონებს - Bayraktar TB-2. ამის შესახებ განაცხადა კომპანიის აღმასრულებელმა დირექტორმა ჰალუკ ბაირაქთარმა.

"ჩვენ არასდროს გავაკეთებდით ასეთ რამეს. იმიტომ, რომ ჩვენ მხარს ვუჭერთ უკრაინის წინააღმდეგობას, მის სუვერენიტეტსა და დამოუკიდებლობას", - განაცხადა მან.

მისი თქმით, თურქული დრონები უკრაინის დამოუკიდებლობისთვის ბრძოლის ერთ-ერთ სიმბოლოდ იქცა და ეს მწარმოებლისთვის დიდი სიამაყეა.

მანამდე უკრაინის თავდაცვის მინისტრმა ოლექსი რეზნიკოვმა განაცხადა, რომ კიევი არის Bayraktar-ის ერთ-ერთი მთავარი მყიდველი, რომელიც რუსეთთან ომის დაწყებიდან 50-მდე აპარატის მფლობელი გახდა.

უახლოეს მომავალში კომპანია მთლიანად უკრაინისთვის იმუშავებს, რადგანაც ქვეყანამ კიდევ რამდენიმე ათეული საბრძოლო დრონი შეუკვეთა.

ივნისის ბოლოს თურქეთის თავდაცვის მრეწველობის სააგენტოს ხელმძღვანელმა ისმაილ დემირმა განაცხადა, რომ ანკარამ გადაწყვიტა მეტი სიფრთხილით მოეკიდოს უკრაინას იარაღის მიწოდებას, რათა არ გაიფუჭოს ურთიერთობა მოსკოვთან. მისი თქმით, ახლა თურქეთი ორიენტირებულია კონფლიქტის მშვიდობიანი მოგვარების ძიებაზე და აპირებს უკრაინას მხოლოდ დაცვის საშუალებების გაგზავნას.