ბორის ჯონსონმა განაცხადა, რომ კონსერვატიული პარტიის ლოდერისა და დიდი ბრიტანეთის პრემიერ-მინისტრის პოსტს ტოვებს, თუმცა პრემიერის მოვალეობას იქამდე შეასრულებს, ვიდრე პარტია ახალ ლიდერს არ აირჩევს.

დაუნინგ-სტრიტზე პრემიერის რეზიდენციასთან საგანგებო პრესკონფერენციაზე, ჯონსონმა თავის მომხრეებსა და ბრიტანელ ხალს მხარდაჭერისთვის მადლობა გამოუცხადა და აღნიშნა, რომ მისთვის წარმოუდგენლად დასანანია მსოფლიოში საუკეთესო სამუშაოს დატოვება.

"ნათელია, "კონსერვატიული პარტიის" სურვილია, რომ უნდა ჰყავდეს ახალი ლიდერი და შესაბამისად, ახალი პრემიერ-მინისტრიც. ვეთანხმები, რომ ამ ახალი ლიდერის არჩევის პროცესი უნდა დაიწყოს ახლა, ვადები მომავალ კვირაში გამოცხადდება", - აღნიშნა ბორის ჯონსონმა.

ბორის ჯონსონის გადადგომა უკავშირდება მორიგ სკანდალს, ამჯერად, სექსუალურ შევიწროებასთან დაკავშირებით.

გასულ კვირას ცნობილი გახდა, რომ კრინს პინჩერმა, რომელსაც ბრიტანეთის მმართველი კონსერვატიული პარტიის საპარლამენტო მდივნის მოადგილის თანამდებობა ეკავა, სექსუალურად შეავიწროვა ორი მამაკაცი დეპუტატი.

მომხდარის ფონზე, 30 ივნისს პინჩერი იძულებული გახდა დაეტოვებინა თანამდებობა. ამავდროულად, გავრცელდა ცნობა, რომ პრემიერ-მინისტრი ჯონსონი ინფორმირებული იყო პინჩერის ქმედებების შესახებ წარსულში, თუმცა მიუხედავად ამისა, იგი მაინც დანიშნა მაღალ თანამდებობებზე.

5 ივლისს მიცემულ ინტერვიუში, ბორის ჯონსონმა ბოდიში მოიხადა კრის პიჩერის თანამდებობაზე დანიშვნის გამო.

ამასთან, მან მიმართა უკრაინელ ხალხს და განაცხადა, რომ კაბინეტი უკრაინის მხარდაჭერას მისი გადადგომის შემდეგაც გააგრძელებს.

პარტიის ლიდერის პოსტისთვის ბრძოლა ზაფხულშივე დაიწყება, ახალი პრემიერ-მინისტრი კი სამუშაოს ოქტომბრიდან შეუდგება.