სამარცხვინოა შეფასება, რომ თურმე კრიმინალი სააკაშვილი და სტრასბურგის მიერ არაერთხელ მხილებული სააკაშვილი-გვარამია უნდა ახსენო იმავე კონტექსტში, რა კონტექსტში უნდა ახსენო ბიძინა ივანიშვილი, - ამის შესახებ განაცხადა ქართული ოცნების დეპუტატმა ანრი ოხანაშვილმა ჟურნალისტებთან საუბარში.

მან კომენტარი გააკეთა საქართველოს პრეზიდენტის მიერ დღეს გაკეთებულ განცხადებაზე, რომლითაც სალომე ზურაბიშვილი რეზოლუციის ტექსტს გამოეხმაურა.

"სამარცხვინოა შეფასება, რომ თურმე კრიმინალი სააკაშვილი და სტრასბურგის მიერ არაერთხელ მხილებული სააკაშვილი-გვარამია უნდა ახსენო იმავე კონტექსტში, რა კონტექსტში უნდა ახსენო ბიძინა ივანიშვილი. სამარცხვინოა ერთ სიბრტყეში დაყენება კრიმინალების და იმ ადამიანის, რომელმაც ჩვენ ხალხს და ჩვენ ქვეყანას კრიმინალებისგან თავი დააღწევინა. ეს არის ფაქტების თავდაყირა დაყენება. კი ბატონო ჩამობრძანდეს პრეზიდენტი, მან უნდა ისაუბროს იმ საკითხებზე, რაზეც თვითონ უნდა ისაუბროს", - თქვა ოხანაშვილმა.

ზურაბიშვილმა განაცხადა, რომ არც სააკაშვილი, არც გვარამია და არც ივანიშვილი არ ღირს საქართველოს მომავლის დაკარგვის ფასად.

"არ მიმაჩნია ვინმეს უნდა გადავყვეთ ამ პროცესის წინსვლაში -არც სააკაშვილს არც გვარამიას და არც ბიძინა ივანიშვილს. არავინ ღირს იმის ფასად რომ ჩენი ბავშვების მომავალი არ დავიცვათ. ამისთვის ვბრუნდები საქართველოში და იქ დავიცავ ამ მომავალს", - თქვა ზურაბიშვილმა.