მოსამართლეთა ტესტების შესაძლო გამჟღავნებასთან დაკავშირებით მოკვლევის შედეგები პროკურატურაში გადაიგზავნება. ამის შესახებ გადაწყვეტილება იუსტიციის უმაღლესმა საბჭომ დღევანდელ სხდომაზე მიიღო.

იუსტიციის უმაღლეს საბჭოს თავმჯდომერის ლევან მურუსიძის განცხადებით, მოხდა ტესტებისა და კაზუსების სავარაუდო გაჟონვა.

"საბჭოს წევრებს გავაცანი აღნიშნული დასკვნა. ითქვა, რომ საქმე გვაქვს ტესტებისა და კაზუსების სავარაუდო გაჟონვასთან, შესაბამისად, ჩემი მხრიდან დადგა წინადადება, რომ აღნიშნული მოკვლევის შედეგები გადაიგზავნოს პროკურატურაში. საბჭოს გადაწყვეტილებით ეს მასალები, რომელიც მოიცავს ნაშრომებს და ტესტირების დარბაზებიდან ამოღებული ვიდეოჩანაწერები, პროკურატურაში უახლოეს დღეებში გადაიგზავნება", - განაცხადა მურუსიძემ. 
მისივე თქმით, საბჭოს წევრებს თეორიულადაც არ ჰქონიათ შეხება ტესტებთან და ისინი მზად არიან პროკურატურასთან თანამშრომლობისთვის.