ანატოლი ჩუბაისმა მდგრადი განვითარების მიზნების მისაღწევად საერთაშორისო ორგანიზაციებთან ურთიერთოებების საკითხებში რუსეთის პრეზიდენტის სპეციალური წარმომადგენლის პოსტი დატოვა და რუსეთდან წავიდა. იტყობინება სააგენტო Bloomberg-ი.

გამოცემის ინფორმაციით, ჩუბაისის ეს გადაწყვეტილება უკრაინაში ომის საკითხზე კრემლთან უთანხმოებას უკავშირდება.

Bloomberg-ი აღნიშნავს, რომ ჩუბაისი ყველაზე მაღალი თანამდებობის პირია, რომელმაც უკრაინაში შეჭრის შემდეგ კრემლთან ურთიერთობა გაწყვიტა.

ანტოლი ჩუბაისი რუსეთის პრეზიდენტის სპეციალურ წარმომადგენლად 2020 წლის დეკემბერში დაინიშნა. მანამდე ის ცხრა წლის განმავლობაში ხელმძღვანელობდა სახელმწიფო კორპორაცია Роснано-ს.

უკრაინაში შეჭრის შემდეგ, მას საჯაროდ არ გაუკეთებია ცალსახად ომის საწინააღმდეგო განცხადებები.

90-იან წლებში ჩუბაისს ეკავა მაღალი თანამდებობები მთავრობაში, მათ შორის იყო პირველი ვიცე-პრემიერი, ასევე რამდენიმე თვის განმავლობაში ხელმძღვანელობდა პრეზიდენტ ბორის ელცინის ადმინისტრაციას.