შვეიცარიის ხელისუფლებამ დააყადაღა ბერნის კანტონში, გოლფ-კურორტზე აპარტამენტი, რომლის მფლობელიც რუსი მილირდერი პიოტრ ავენია.

ავენი რუსეთის უმსხვილესი ბანკის "ალფა ბანკის" თანადამფუძნებელია და ბოლო დრომდე ამ ფინანსური ინსტიტუტის დირექტორთა საბჭოს მეთაურობდა. ავენმა დირექტორთა საბჭოს ხელმძღვანელის პოსტი 1-ელ მარტს მას შემდეგ დატოვა, რაც უკრაინაში რუსეთის შეჭრის გამო სანქცირებულთა ნუსხაში აღმოჩნდა.

დაყადაღებული სამოთახიანი აპარტამენტი მდებარეობს შვეიცარიის დედაქალაქ ბერნის კანტონში, გოლფის კურორტზე, მდიდრული Les Hauts de Gstaad კომპლექსის მეხუთე სართულზე.

გასულ კვირას იტალიის ხელისუფლებამ ხმელთაშუა ზღვის კუნძულ სარდინიაზე ავენის საკუთრებაში არსებული სამშენებლო კომპლექსი დააკავა. თავად მილიარდერმა მასზე დაწესებულ სანქციებს "უსაფუძვლო და არაგონივრული" უწოდა.

2021 წელს ავენის ქონება 5 მილიარდ დოლარად შეფასდა, მან 30-ე ადგილი დაიკავა რუსეთის 200 უმდიდრესი ბიზნესმენის სიაში.