უკრაინის პრეზიდენტმა ვოლოდიმირ ზელენსკიმ ვიდეომიმართვაში განაცხადა, რომ უკრაინის თავდაცვის ფრონტის ხაზი სავსეა რუსი ჯარისკაცების ცხედრებით და ისინი არავის მიაქვს.

„განსაკუთრებით სასტიკი ბრძოლების ადგილებში ჩვენი თავდაცვის ფრონტის ხაზი სავსეა რუსი ჯარისკაცების ცხედრებით და ეს ცხედრები არავის მიაქვს. კიდევ ერეკებიან ახალ შეტევით ნაწილებს, რაღაც რეზერვებს, რომლებსაც რუსეთის არმიის სარდლობა აგროვებს იქ, სადაც შეუძლია“, - განაცხადა უკრაინის პრეზიდენტმა და კიდევ ერთხელ მიმართა რუსეთის მოქალაქეებს:

„ჩვენ კარგად ვიცით, რომ რუსეთში ღრმა ადამიანური რესურსი და უამრავი აღჭურვილობა, რაკეტა და ბომბია. მაგრამ მინდა, ვკითხო რუსეთის მოქალაქეებს – რა გიქნეს ამ წლების განმავლობაში, რომ თქვენს დანაკარგებს ვეღარ ამჩნევთ? აღარაფერს ნიშნავს თქვენთვის სიტყვები – შვილი, დედა, მამა. უკვე 14 ათასზე მეტი თქვენი სამხედრო დაიღუპა. ეს არის 14 ათასი დედა, 14 ათასი მამა, ესენი არიან ცოლები, ესენი არიან შვილები, ნათესავები, მეგობრები და თქვენ ამას ვერ ამჩნევთ? იქნება მეტი მსხვერპლი, ვიდრე ეს ომი გაგრძელდება, ეს არის თქვენი ომი ჩვენს წინააღმდეგ, რუსეთის ომი უკრაინის წინააღმდეგ, ჩვენს მიწაზე“, – აღნიშნა ზელენსკიმ.