ჩინეთის ლიდერმა სი ძინპინმა აშშ-ის პრეზიდენტს ჯო ბაიდენს განუცხადა, რომ უკრაინაში მიმდინარე მოვლენების მსგავსი კონფლიქტები და კონფრონტაციები არავის ინტერესებს ემსახურება. ამის შესახებ Reuters-ი ჩინეთის სახემწიფო მედიზე დაყრდნობით იტყობინება.

„უკრაინის კრიზისი ეს ის არის, რისი ნახვაც არ გვსურს“, - განაცხადა ჩინეთის ლიდერმა ბაიდენთან შეხვედრისას. ამასთნ, აღნიშნა, რომ ჩინეთმა და შეერთებულმა შტატებმა ორმხრივი ურთიერთობები სწორი მიმართულებით უნდა გააგრძელონ. მისივე თქმით, ორივე მხარემ უნდა აიღოს პასუხისმგებლობა და მიმართოს ძალისხმევა მსოფლიოში მშვიდობის დასამყარებლად.

მანამდე ბაიდენის ადმინისტრაციამ ჩინეთი გააფრთხილა, რომ პეკინი გამანადგურებელი შედეგების წინაშე აღმოჩნდება, თუ რუსეთის პრეზიდენტს უკრაინაში მატერიალურ მხარდაჭერას გაუწევს. მედიის ინფორმაციით, აშშ-მა თავის მოკავშირეებს აცნობა, რომ ჩინეთმა მიანიშნა, რომ მზად არის მოსკოვს სამხედრო ტექნიკა მიაწოდოს, რომელიც მას რუსეთმა სთხოვა.

მოსკოვმა უარყო ჩინეთისადმი სამხედრო დახმარების თხოვნა, ჩინეთის საგარეო საქმეთა სამინისტრომ კი აღნიშნულს „დეზინფორმაცია“ უწოდა.