სააკაშვილი დააჯერეს, რომ გადმოკვეთდა საზღვარს და მთელი საქართველო გაერთიანდებოდა, რომ რევოლუციური პროცესი განევითარებინათ, - ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

მისი თქმით, მიხეილ სააკაშვილი ხიბლშია ჩავარდნილი და რეალობას არ უნდა თვალი გაუსწოროს.

„,მთელი ოპოზიციური სპექტრი, ვინც „ნაცმოძრაობის“ სატელიტებად შეიძლება, მოვიაზროთ, ასევე თავად „ნაცმოძრაობაც“ ცდილობს, როგორმე ამ ბოდვაში გაამართლოს სააკაშვილი. რეალურად, საზღვრის უკანონო კვეთაზე არავინ საუბრობს. შეიძლება ითქვას, რომ ეს არის პრაქტიკულად ის არშემდგარი შეთქმულება, რომელიც იყო ჩაფიქრებული. ის დააჯერეს, რომ გადმოკვეთდა საზღვარს და მთელი საქართველო გაერთიანდებოდა, რომ რევოლუციური პროცესი განევითარებინათ. შემდეგ დააჯერეს, რომ მას გამოიხსნიან საკნიდან მას მერე, რაც ხალხი შეიკრიბება აღშფოთებული და გამოაცხადებენ დაუმორჩილებლობას. შემდეგ დააჯერეს ან თვითონ დაიჯერა, რომ არჩევნებში გამარჯვებული „ნაცმოძრაობაა“. ეს გარკვეულ ინდიკაციადაც შეიძლება, მივიღოთ, თუ რა მდგომარეობაშია თვითონ პიროვნულად, რას აპირებდა და რეალობისა და ფანტაზიების ერთმანეთთან დაპირისპირებაში, რა შეიშლება ადამიანმა წარმოთქვას, როდესაც სავსებით კონკრეტული დანაშაულებისათვის ასამართლებენ“, – განაცხადა ვოლსკიმ.