ოპოზიციის მიერ შემუშავებული საკონსტიტუციო ცვლილებათა პროექტი, რომელიც პარლამენტში 200 ათასი მოქალაქის ხელმოწერით შევიდა, იურიდიულ კომიტეტზე ჩავარდა. 

კენჭისყრისას პროექტს მხარი 7-მა დეპუტატმა დაუჭირა, წინააღმდეგ ხმა პარლამენტის 6-მა წევრმა მისცა, თავი კი სამმა შეიკავა. გადაწყვეტილების მიღებას 9 ხმა სჭირდებოდა. 

პროექტის თანახმად, არსებული საარჩევნო სისტემა იცვლება - უქმდება მაჟორიტარული არჩევნები და პარლამენტის 150 მანდატიდან 75 - ერთიანი პროპორციული სისტემით, ხოლო 75 სამხარეო-პროპორციული სისტემით გადანაწილდება.

კომიტეტზე საკითხის ჩავარდნის მიუხედავად, პროექტი სესიაზე მაინც განიხილება. ოპოზიციამ კი დღეს კომიტეტის სხდომაზე ითხოვა, რომ საარჩევნო სისტემის საკითხთან დაკავშირებით ინტეპარტიულ ფორმატში შეხვედრების გამართვამდე, ინიცირებული პროექტის პლენარულ სხდომაზე გატანა არ მოხდეს.