ყოფილი პრეზიდენტის მიხეილ სააკაშვილის ციხის ფანჯარასთან გამოჩენის გამო იუსტიციის სამინისტროს გენინსპექციამ მოკვლევა დაიწყო.

სამინისტროს ცნობით, გენერალურმა ინსპექციამ მე-12 პენიტენციურ დაწესებულებაში ფანჯრის ჩამომტვრევის ფაქტზე წინასაგამოძიებო მოქმედებები დაიწყო.

მათი განმარტებით, ამის საფუძველი შეტყობინება გახდა, რომლის თანახმად, მსჯავრდებულ მიხეილ სააკაშვილის საშხაპე ოთახში ყოფნისას ფანჯრის მინა ჩამოიმტვრა. უწყება აცხადებს, რომ ადვოკატთან შეთანხმებით, 22 ოქტომბერს დაიგეგმა მიხეილ სააკაშვილთან გასაუბრება.

ადვოკატების ინფორმაციით, შესაძლოა პატიმარ მიხეილ სააკაშვილს სანქციები დაუწესონ.

მიხეილ სააკაშვილი რუსთავის ციხის საკნიდან მხარდამჭერებს იმ დროს მიესალმა, როდესაც მე-12 სასჯელაღსრულების დაწესებულებასთან საპროტესტო აქცია მიმდინარეობდა.