საქართველო ჯანმრთელობის მსოფლიო ორგანიზაციის Covax პლატფორმიდან Novavax-ის ვაქცინის 700 000-მდე დოზას მიიღებს. ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა, ამირან გამყრელიძემ განაცხადა.

მისივე თქმით, საქართველოს Covax პლატფორმიდან ასევე მიიღებს Johnson & Jonhnson-ის ვაქცინის 130 000-მდე დოზას.

"ქვეყანაში აცრების ინტენსივობა თანდათან იზრდება. დღესდღეობით ჩვენ მარაგში გვაქვს როგორც პირველი, ისე მეორე აცრისთვის 160 000-მდე დოზა ვაქცინის. იცით, რომ მოსალოდნელია და უკვე დაზუსტებულია, რომ ივნისის ბოლოს, ივლისის პირველ რიცხვებში ქვეყანა დაახლოებით ნახევარ მილიონ დოზა "სინოფარმს" მიიღებს. ასევე მესამე კვარტალში განსაზღვრულია უკვე დაახლოებით მილიონი დოზა "ფაიზერის" ვაქცინის მიღება. ასევე, "კოვაქსმაც" დაადასტურა დაახლოებით "ნოვოვაქსის" ვაქცინის 700 000-მდე და "ჯონსონ ენდ ჯონსონის" 130 000-მდე დოზის მესამე კვარტალში მოწოდება", - განაცხადა ამირან გამყრელიძემ.