სოფელ გუმათში რიონის ხეობის მცველს, მაკა სულაძესა და ჰომოფობიური და ძალადობრივი ჯგუფის წევრებს, ალექსანდრე და გურამ ფალავანდიშვილებს შორის სიტყვიერი დაპირისპირება მოხდა.

მაკა სულაძის თქმით, ფალავანდიშვილების ჩარევა ამ საკითხში საჭირო არ არის და ნამახვანჰესის საწინააღმდეგო აქციის მონაწილეებს ვერავინ მიუთითებს.

"მე მასწავლით ქრისტიანობას და ჯვარს როდის გადავდებ გვერდით და როდის დავიჭერთ ხელში? ვერ შეგაგნებინეთ შემწყნარებლობა. თუ ხართ ჩვენს ომში, კეთილი ინებეთ და დადექით ჯარისკაცად და ჩვენ თვითონ მივუთითებთ აქ ვის რა გავუკეთოთ, თქვენთვის არ დაგვივალებია. არ მოგვეწონება? შემოვა ის თავისი ნიშნით, თავისი დროშით და თავისი იდეოლოგიას თუ მოახვევს თავზე, საკმარისი ძალა გვყავს, რომ მივლენ ბიჭები... არ არის საჭირო თქვენი ჩარევა", - მიმართა სულაძემ ფალავანდიშვილებს.

24 მაისს რესპუბლიკის მოედანზე ნამახვანჰესის საწინააღმდეგო აქციაზე მისულ აქტივისტებს, სალომე ბარკერს და ზუკა ბერძენიშვილს, გურამ ფალავანდიშვილის შვილმა ალექსანდრე ფალავანდიშვილმა და მისმა თანმხლებმა პირებმა სიტყვიერი შეურაცხყოფა მიაყენეს და ტერიტორიის დატოვება მოსთხოვეს. თავდასხმის მიზეზი ცისარტყელას ფერებში გაფორმებული სამკლაური გახდა.

ნამოხვანჰესის საწინააღმდეგო აქციები რამდენიმე დღის განმავლობაში თბილისში იმართებოდა.  გუშინ კი აქციის მონაწილეები ხეობაში დაბრუნდნენ.