დღეს საქართველოში ოჯახის სიწმინდის დღე აღინიშნება. ოჯახის სიწმინდის დღე ილია მეორემ 2014 წელს დააწესა.

წელს პანდემიიდან გამომდინარე, გარკვეული ღონისძიებები არ გაიმართება. საპატრიარქოს მიერ გავრცელებულ განცხადებაში წერია, რომ ეკლესია ითვალისწინებს ეპიდემიოლოგიურ მდგომარეობას და თავს იკავებს საყოველთაო მსვლელობისა და ფართომასშტაბიანი ღონისძიებებისგან.

მოძღვრები 11:00 საათზე სამების ტაძარში შეიკრიბებიან და წყალს აკურთხებენ. მოგვიანებით კი, მოსახლეობისა და ქუჩების კურთხევისთვის ხუთი მიმართულებით გაემართებიან.

17 მაისი ჰომოფობიასთან, ტრანსფობიასა და ბიფობიასთან ბრძოლის საერთაშორისო დღეა. ამავე დღეს, 2014 წლიდან, საქართველოში ოჯახის სიწმინდის დღეც აღინიშნება, რომელიც ილია მეორემ დააწესა. ოჯახის სიწმინდის დღის გამოცხადებამდე ერთი წლით ადრე, 2013 წლის 17 მაისს, ჰომოფობიასთან, ტრანსფობიასა და ბიფობიასთან ბრძოლის საერთაშორისო დღის აღსანიშნავად შეკრებილი რამდენიმე ათეული მშვიდობიანი მანიფესტანტი კონტრაქციის მონაწილეებმა, მათ შორის სასულიერო პირებმა დაარბიეს.