საქართველოს ეკონომიკისა და მდგრადი განვითარების მინისტრის, ნათია თურნავას განცხადებით, საქართველოში ირვეი ვაქცინირებული ტურისტების პირველი ნაკადები ჩამოდის, რაც სასიხარულო ინფორმაციაა. ამის შესახებ თურნავამ მთავრობის ადმინისტრაციაში გამართულ ბრიფინგზე განაცხადა.

"ასევე, სასიხარულო ინფორმაციაა, რომ უკვე გამოჩნდა პირველი ვაქცინირებული ტურისტების ნაკადებიც. კერძოდ, მარტის ბოლოს ისრაელის ავიაკომპანია "არკია" შეასრულებს სამ ტურისტულ ჩარტერულ რეისს, 19, 22 და 26 მარტს თელ ავივი-ბათუმი-თელ ავივის მიმართულებით. ეს არის შემსუბუქების პირველი შედეგი", - აღნიშნა ნათია თურნავამ.

ნათია თურნავამ ბრიფინგზე რეგულარული ფრენების აღდგენის შემდეგ არსებულ დინამიკაზეც ისაუბრა.

"მინდა, ჩვენს მოსახლეობას გარკვეულწილად პატარა ანგარიში ჩავაბარო. მოგეხსენებათ, პირველი თებერვლიდან, უწყებათაშორისი საკოორდინაციო საბჭოს გადაწყვეტილებით, გავაუქმეთ და მოვხსენოთ ყველა შეზღუდვა საერთაშორისო ფრენებზე, კერძოდ, რეგულარულ ფრენებზე. დღესდღეობით გვაქვს შემდეგი სურათი, რომ თებერვლიდან საქართველოს მიმართულებით ფრენები უკვე განაახლეს უკრაინის საერთაშორისო ავიახაზებმა კვირაში ორი სიხშირით, "ფლაი დუბაიმ" კვირაში ოთხი სიხშირით, "ეარ არაბიამ" კვირაში ორი სიხშირით, ხოლო მარტის შუა რიცხვებიდან დაემატება ავიაკომპანია "ბუტა ერვეისი", ბაქო-თბილისი-ბაქოს მიმართულებით, კვირაში სამი სიხშირით. ეს არის დაბალბიუჯეტიანი ავაკომპანია. ასევე, იფრენენ "ეარასტანა" და ყაზახეთის დაბალბიუჯეტიანი ავიაკომპანია "ფლაი არისტანი", - აღნიშნა ნათია თურნავამ.