14 წლის გარდაცვლილი გოგოს ბაბუა ტელეკომპანია "პირველთან" საუბრისას ამბობს, რომ თავის მოკვლით გოგონამ დანაშაული გამოისყიდა.

"ბავშვმა მოიკლა თავი, მისი დანაშაული გამოისყიდა მან და ვსო, დამთავრდა", - ამბობს ბაბუა.

ჟურნალისტის მიერ დასმულ შეკითხვაზე, თუ რა დანაშაულს გულისხმობდა, ბაბუა პასუხობს, "დანაშაული, რომ გაუპატიურებული იყო".

ბაბუასთან ინტერვიუ "ნოდარ მელაძის შაბათმა" ჩაწერა.

14 წლის გოგონამ ქობულეთში სიცოცხლე თვითმკვლელობით 9 თებერვალს დაასრულა. გავრცელებული ინფორმაციით, მანამდე გოგონაზე ორჯერ სექსუალურად იძალადეს.

გოგონაზე სექსუალური ძალადობა გასული წლის დეკემბერში განხორციელდა.

სექსუალურად მოძალადე მოსამართლის განჩინებით, მხოლოდ გოგონას გარდაცვალების შემდეგ, 10 თებერვალს დააკავეს, პროკურატურამ ბრალი 12 თებერვალს წარუდგინა. დღეს, ბათუმის საქალაქო სასამართლომ აღკვეთის ღონისძიების სახით მას პატიმრობა შეუფარდა.

გოგონას დედა, რომელის თურქეთიდან შვილის დაკრძალვამდე ერთი დღით ადრე დაბრუნდა, აცხადებს, რომ მოზარდი ნათესავებმა "უმოწყალოდ სცემეს".