ეკონომიკის მინისტრის, ნათია თურნავას თქმით, მთავრობა აკვირდება ე.წ "წერტილოვანი შეზღუდვების" შემსუბუქების პირველ ეტაპს, რაც ქვეყნის მასშტაბით ბიზნესაქტივობების გახსნას გულისხმობს – არასასურსათო ვაჭრობას, მოლებს, მცირე და დიდ ქსელურ მაღაზიებს.

"როგორც იცით, რიგში დგანან ბაზრობები, რომლებიც მალე გაიხსნება. ასევე დანარჩენ დიდ ქალაქებში თბილისში, რუსთავსა და ქუთაისში სარესტორნე ინდუსტრია ელოდება გახსნას. დიდი იმედი მაქვს, რომ ბიზნესაქტივობის გახსნის პირველი ეტაპი წარმატებით ჩაივლის... შემსუბუქდა შემოყვანის რეჟიმი და როგორც იცით, შეზღუდვის გარეშე ვმასპინძლობთ ნებისმიერი ქვეყნიდან ჩამოსულ ვიზიტორს, ვისაც ვაქცინაციის ცნობა ექნება, ხოლო საკმაოდ ბევრი ქვეყნიდან ჩამოსულ ვიზიტორებს პისიარ ტესტით და მესამე დღეს ტესტირების ვალდებულებით შეეძლებათ შემოსვლა, რაც გვაძლევს საშუალებას, თანდათან მეტი ტურისტული ნაკადი მივიღოთ". – ამბობს ნათია თურნავა.

დღეიდან, საკოორდინაციო საბჭოს გადაწყვეტილებით სავაჭრო ცენტრები და ობიექტები ყველა რეგიონში გაიხსნა. თბილისის, რუსთავისა და ქუთასის გარდა, სკოლებისა და საზოგადოებრივი ტრანსპორტის მუშაობაც აღდგა.