რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა აცხადებს, რომ მოსკოვი შეშფოთებულია შავ ზღვაში ნატოს სამხედრო აქტივობის გაზრდით და ამბობს, რომ ალიანსის ეს ქმედებები ძირს უთხრის რეგიონალურ სტაბილურობას.

მისი თქმით, რუსეთის საზღვართან შავი ზღვაში იზრდება ნატოს წევრი ქვეყნების შეიარაღებული ძალების, სადაზვერვო თვითმფრინავებისა და უპილოტო საფრენი აპარატების  ფრენების რაოდენობა.

ზახაროვა ამბობს, რომ ნატო თავისი საქმიანობით უკრაინასა და საქართველოს „წვრთნის“ რუსეთის წინააღმდეგ,  წვრთნების საშუალებით აქეზებს ამ ქვეყნებს რუსეთთან დასაპირისპირებლად.

ამასთან, ის ირწმუნება, რომ მოდერნიზებულია ბულგარეთისა და რუმინეთის ინფრასტრუქტურა, მათ ტერიტორიებზე განლაგებულია შეტევითი იარაღი. მისი მტკიცებით, სწავლებების დროს მუშავდება სცენარები, რომლებიც მოიაზრებენ იერიშებს, მათ შორის რუსეთის ტერიტორიაზეც.

„ეს ჩვენში იწვევს სერიოზულ შეშფოთებას. იძულებულები ვართ გავითვალისწინოთ ალიანსის, მისი წევრი ქვეყნების  სამხედრო აქტივობის ზრდა და ვიმოქმედოთ შესაბამისად“, -  ამბობს ზახაროვა.