ვადამდელი არჩევნების ჩატარებისა და "ლოქდაუნის" გაუქმების მოთხოვნით პარლამენტის მიმდებარე ტერიტორიაზე მოქალაქეები აქციას მართავენ.

ადგილზე შეკრებილებმა საკანონმდებლო ორგანოსთან კარვები გაშალეს. მათ სიმბოლური წითელი ხაზიც გაავლეს და ამბობენ, რომ ხაზს მიღმა საბჭოთა კავშირია, ხოლო "მერე მხარეს თავისუფალი საქართველო".

აქციის მონაწილეთა შეფასებით, დაწესებული შეზღუდვები დისკრიმინაციულია და მათი შემოღებით ხელისუფლებამ მოსახლეობა შიმშილისთვის გაწირა.

ანალოგიური აქცია ბათუმშიც მიმდინარეობს.

მთავრობის გადაწყვეტილებით, 28 ნოემბრიდან ქვეყანაში ახალი საკარანტინო შეზღუდვები დაწესდა. მათ შორის, გადაადგილებაზე შეზღუდვა (კომენდანტის საათი) 1 საათით გადმოიწია და 21:00 სთ-დან დაიწყება.

საკოორდინაციო საბჭოს გადაწყვეტილებით, 28 ნოემბრიდან 24 დეკემბრამდე დიდ ქალაქებში: თბილისში, ბათუმში, ქუთაისში, რუსთავში, გორში, ფოთში, ზუგდიდში, თელავში, ასევე სათხილამურო კურორტებზე: ბაკურიანში, გუდაურში, გოდერძსა და მესტიაში სურსათის მაღაზიების, სილამაზისა და სპა სალონების გარდა, დაიკეტა ყველა სხვა სავაჭრო ობიექტი.

ფოტო: ფორმულა