ჩვენ უნდა უზრუნველვყოთ 2030 წლის დღის წესრიგის მაქსიმალური საზოგადოებრივი მხარდაჭერა, - ამის შესახებ პრემიერ-მინისტრმა ირაკლი ღარიბაშვილმა გაერო-ს 2015 წლის შემდგომი მდგრადი განვითარების სამიტზე სიტყვით გამოსვლისას განაცხადა.

„ჩემთვის დიდი პატივია თქვენ წინაშე გამოსვლა ამ ისტორიულ მომენტში, როდესაც ჩვენ ვიწყებთ მუშაობას ტრანსფორმირებაზე ორიენტირებული მდგრადი განვითარების მიზნების დღის წესრიგზე. დღეს ჩვენ ვიწყებთ სვლას ამბიციურ გზაზე, რომელიც ითხოვს გაბედულ ნაბიჯებს, რათა ვუპასუხოთ კაცობრიობის წინაშე მდგარ უზარმაზარ გამოწვევებს.

მდგრადი განვითარების 17 მიზნისა და თანმდევი 169 სამიზნის მიზანია, მეგზურობა გაგვიწიოს ამ რთულ გზაზე. ძალიან მნიშვნელოვანია ბუნებრივად და დაუბრკოლებლად მოხდეს გადასვლა ათასწლეულის განვითარების მიზნებიდან 2015 წლის შემდგომი მდგრადი განვითარების მიზნების დღის წესრიგზე. 2000 წელს ათასწლეულის განვითარების მიზნების სტრატეგია მართლაც რევოლუციური იყო, რადგანაც მისი მეშვეობით გამოვნახეთ საერთო ენა გლობალური გამოწვევების დასაძლევად. საქართველოში დაინტერესებული მხარეებისთვის ის იქცა ინსტრუმენტად, რომლის მეშვეობითაც ისინი, სამოქალაქო საზოგადოებასა და საერთაშორისო საზოგადოების წარმომადგენლებთან ერთად, მსჯელობდნენ განვითარების შესახებ, ახდენდნენ მის პრიორიტეტიზაციასა და ადვოკატირებას. მდგრადი განვითარების მიზნების დღის წესრიგის ამოქმედება ახალ ბიძგს აძლევს ამ ძალისხმევას. ამ პროცესში ჩვენ უნდა უზრუნველვყოთ 2030 წლის დღის წესრიგის მაქსიმალური საზოგადოებრივი მხარდაჭერა და ჩართულობა”, - განაცხადა ირაკლი ღარიბაშვილმა.