დიდი ბრიტანეთის დედოფალმა ელისაბედ მეორემ ნატურალური ბეწვისგან დამზადებულ სამოსზე უარი თქვა. ამის შესახებ მისმა პირადმა მრჩეველმა და მთავარმა დიზაინერმა ანჯელა კელიმ თავის წიგნში დაწერა. იუწყება The Telegraph-ი.

სავარაუდოდ, დედოფალი წელსვე, ზამთრის ცივ დღეებში ხელოვნური ბეწვისგან შექმნილ სამოსს ჩაიცვამს.

ამასთან, გაურკვეველია, გავრცელდება თუ არა ელისაბედ მეორის გადაწყვეტილება საცერემონიო ჩაცმულობაზე, რომელიც მოიცავს ყარყუმისბეწვიან ხავერდის მოსასხამს. ელისაბედს ეს მოსასხამი ემოსა 1953 წელს, თავის კორონაციაზე. თუმცა, აშკარაა, რომ მონარქი აღარ ჩაიცვამს ქურქს რიგითი ოფიციალური გამოსვლების დროს.

დედოფლის დიზაინერს ასევე არ დაუზუსტებია რამ გამოიწვია დედოფლის გადაწყვეტილება. თუმცა აღნიშნულია, რომ ელისაბედ მეორე არაერთგზის გაუკრიტიკებიათ ქურქების ჩაცმის გამო.

ცხოველთა უფლებების დამცველებმა გამოცემას განუცხადეს, რომ დედოფლის გადაწყვეტილებას მიესალმებიან.

თავიანთ კოლექციებში ბუნებრივ ბეწვეულზე უარი თქვეს ისეთმა ცნობილმა ბრენდებმა, როგორებიცაა Prada, Versace, Gucci, Burberry, Michael Kors-ი და სხვა.