აშშ-ი კლიმატის შესახებ პარიზის შეთანხმებას ტოვებს. სახელმწიფო მდივნის მაიკ პომპეოს თქმით, შეერთებულმა შტატებმა ამის თაობაზე გაეროს ოფიციალურად უკვე მიმართა.

 „დღეს შეერთებულმა შტატებმა პარიზის შეთანხმებიდან გასვლის პროცესი დაიწყო. შეთანხმების პირობების თანახმად, შეერთებულმა შტატებმა ოფიციალურად აცნობა გასვლის შესახებ გაერთიანებული ერების ორგანიზაციას. შეთახმებიდან გასვლა ძალაში მიმართვიდან ერთი წლის შემდეგ შევა“, - ნათქვამია პომპეოს განცხადებაში.

პომპეომ აღნიშნა, რომ დონალდ ტრამპმა შეთანხმების დატოვების შესახებ გადაწყვეტილბა იმის გამო მიიღო, რომ აშშ-ს „ეკონომიკური ტვირთი უსამართლოდ“ დააწვა.

კლიმატის შესახებ პარიზის შეთანხმება 2015 წლის 12 დეკემბერს პარიზში გაფორმდა და ძალაში 2016 წლის 4 ნოემბერს შევიდა. ის მიმართულია კლიმატის ცვლილებების საფრთხის გლობალური რეაგირებისკენ. შეთანხმებას 175 ქვეყანა შეუერთდა.