აშშ-ის პრეზიდენტმა დონალდ ტრამპმა სირიაში, თურქეთსა და ახლო აღმოსავლეთში არსებულ ვითარებასთან დაკავშირებით „კარგი ამბები“ დააანონსა.

თურქეთსა და აშშ-ის შორის 17 ოქტომბერს მიღწეული შეთანხმება 120 საათით საომარი მოქმედების შეწყვეტის შესახებ 22 ოქტომბრის 23 საათზე ამოიწურა. სირიელმა ქურთებმა აშშ-ის ადმინისტრაციას აცნობეს, რომ შეთანხმების ფარგლებში აღებული ყველა ვალდებულება შესრულეს და უსაფრთხოების ზონა დატოვეს.

 „როგორც ჩანს, კარგი ამბებია თურქეთთან, სირიასა და ახლო აღმოსავლეთთან დაკავშირებით. მიგვიანებით ახალ ცნობებს მოგაწვდით“, - წერს ტრამპი მიკრობლოგ Twitter-ზე.

თურქეთმა ჩრდილო-აღმოსავლეთ სირიაში სამხედრო ოპერაცია „მშვიდობის წყარო“ 9 ოქტომბერს დაიწყო. ხელისუფლების განცხადებით მის მიზანს ქურთული ფორმირებების, „ისლამური სახელმწიფოს“ მებრძოლთა განადგურება და საზღვრის გასწვრივ უსაფრთხოების ზონის შექმნა წარმოადგენს.