ბრიტანეთის პრემიერმა ბორის ჯონსონმა განაცხადა, რომ ევროკავშირთან „ბრექსიტის“ შესახებ შეთანხმება მიღწეულია. ევროკავშირის წარმომადგენელმა შეთანხმების არსებობა დაადასტურა.

 „გვაქვს შესანიშნავი ახალი შეთანხმება, რომელიც ჩვენ კონტროლს გვიბრუნებს“, - დაწერა ბორის ჯონსონმა მიკრობლოგ „ტვიტერზე“.

შეთანხმება ევროკავშირის სამიტზე 17-18 ოქტომბერს უნდა დამტკიცდეს, შემდეგ ის უნდა დაამტკიცოს ბრიტანეთის თემთა პალატამ 19 ოქტომბერს, საგანგებო სხდომაზე.

თუმცა ბრიტანეთის პარლამენტმა შესაძლოა, პრემიერ-მინისტრს ცხოვრება გაუმწაროს: თემთა პალატამ, სადაც უმრავლესობას ბორის ჯონსონის ოპონენტები წარმოადგენენ, შესაძლოა, „ბრექსიტის“ შესახებ შეთანხმების ახალი ვარიანტი არ მიიღოს.

წლის დასაწყისიდან ბრიტანელმა დეპუტატებმა ბრიუსელისა და ტერეზა მეის მთავრობის მიერ შედგენილი პროქეტი სამჯერ ჩააგდეს.