თბილისში, პირველი რესპუბლიკის მოედანზე სასულიერო პირები შეიკრიბნენ.

მათი განცხადებით, ისინი არ ენდობიან „თბილისი პრაიდის“ გადადებასთანდაკავშირებით ორგანიზატორების განცხადებას და მაინც რჩებიან პირველი რესპუბლიკის მოედანზე.

ამასთან, როგორც სასულიერო პირები აცხადებენ, მათი ნაწილი ქაშუეთის ეკლესიასთან შეიკრიბება და პარაკლისს გადაიხდის.

„ყოველთვის ვიქნებით იმის წინააღმდეგი, რაც ახლა ხდება და მიუხედავად იმისა, რომ გამთენიისას გამოაცხადეს, რომ „თბილისის პრაიდი“ გადაიდება, ჩვენ მაინც ყურადღებით ვართ. რაც შეეხება გეგმებს, ყველგან ვიქნებით, სადაც ჩავთვლით საჭიროდ, რომ ჩვენი ღირსება იყოს დაცული. კიდევ ერთხელ მოვუწოდებთ ადამიანებს, რომლებიც ორგანიზებას უწევენ ამ პრაიდებს, უცხო ქვეყნის მიერ დაფინასებული ორგანიზაციები, რომლებიც ამ პრაიდებს გეგმავენ, რომ ჩვენ ვართ საქართველოში და ამას ეყოლება ყოველთვის მოწინააღმდეგეები“, – განაცხადა დეკანოზმა, დავით ლასურაშვილმა.

„თბილისი პრაიდის“ მოწინააღმდეგეებმა 06:30 საათიდან დაიწყეს შეკრება კახეთის გზატკეცილზე მდებარე შინაგან საქმეთა სამინისტროს შენობასთან. ისინი აცხადებენ, რომ პრაიდის ორგანიზატორებს აქციის ჩატარების შესაძლებლობას არ მისცემენ.

„ღირსების მარში“ შინაგან საქმეთა სამინისტროს შენობასთან დღეს უნდა გამართულიყო, თუმცა, აქციის ორგანიზატორებმა ინფორმაციის გაჟონვის გამო და უსაფრთხოების მიზნით, ღონისძიება ისევ გადადეს.