აჭარის რელიეფის რთული ხასიათი, ფერდობების დახრილობისა და დანაწევრების მაღალი დონე სოფლის მეურნეობის განვითარებას აფერხებს, აღნიშნულის შესახებ ”პოლიტიკის და მართვის კონსალტინგ ჯგუფი - PMCG”-ის მიერ შემუშავებულ აჭარის ავტონომიური რესპუბლიკის სოფლად განვითარების 2016-2021 წლების სტრატეგიაშია აღნიშნული.

როგორც სტრატეგიაშია განმარტებული, აჭარაში, აღრიცხული 11 ტიპის ნიადაგიდან, ყველაზე დიდი ფართობები უჭირავს ალუვიურ და წითელმიწა (ზღვის სანაპირო ზონა), ყომრალ (მთიანეთი) და მთა-მდელოს კორდიან (ალპური ზონა) ნიადაგებს.

სასოფლო-სამეურნეო მიწებს რეგიონში მთელი ტერიტორიის მხოლოდ 25% უკავია, საიდანაც დიდი ნაწილი 100 მ-ზე მეტი დახრილობის ფერდობებზეა განთავსებული.

აჭარაში სოფლის მეურნეობის ძირითადი დარგებია მეციტრუსეობა (ძირითადად მანდარინი) და თხილის წარმოება; სიმინდისა და კარტოფილის წარმოება და მეცხოველეობა; ტრადიციულ დარგებად კი ითვლება მევენახეობა, მეთევზეობა, მარცვლეულის წარმოება და მეფუტკრეობა, ხოლო დამხმარე დარგებად - ჩაის, აბრეშუმის, თამბაქოს და სამკურნალო მცენარეების წარმოება. რეგიონი მცირე მიწიანია, რთული რელიეფით და შინამეურნეობების საკუთრებაში არსებული სასოფლო-სამეურნეო ნაკვეთებს მაღალი ფრაგმენტაციით.

აჭარის ტყის ფონდის ფართობი 153.4 ათასი ჰექტარია, რაც მთელი ტერიტორიის 53%-ს შეადგენს. ყველაზე დიდ ფართობებზე გავრცელებულია წიფელი, წაბლი, ნაძვი და სოჭი. 2012 წლის მდგომარეობით დაავადებული ტყის ფართობი აჭარის ტყეების მთლიანი ფართობის 7,2 პროცენტია. დეგრადირებულია ან დეგრადაციას განიცდის რეგიონში არსებული ტყეების 60%, ტყის კორომებში ინტენსიურად ვითარდება ეროზიული და მეწყერული პროცესები. ტყის მნიშვნელოვან ნაწილს დაკარგული აქვს ბუნებრივი თვით-აღდგენის უნარი. საერთაშორისო და ადგილობრივი მნიშვნელობის დაცულ ტერიტორიებს აჭარის არ-ის ტერიტორიის 13,6% უჭირავს.

როგორც სტრატეგიიდან ირკვევა, აჭარაში სოფლად განვითარებასთან დაკავშირებული ძლიერი და სუსტი მხარეების, შესაძლებლობებისა და საფრთხეების სიტუაციური ანალიზი ჩატარდა დაინტერესებულ მხარეებთან, სამოქალაქო საზოგადოებისა და ბიზნესსექსტორის წარმომადგენლებთან შევედრებზე. გაანალიზირებული იქნა სასოფლო-სამეურნეო პროდუქციის წარმოებისა და ტყის სექტორები, საცხოვრებელი გარემოსა და არასასოფლო-სამეურნეო საქმიანობის მიმართულებით აჭარაში არსებული მდგომარეობა და მაცხოვრებელთა კვალიფიკაცია. იმის გამო, რომ აჭარის სოფლად განვითარების სტრატეგია დაფუძნებულია ევროკავშირის მეთოდოლოგიაზე შედეგების ანალიზისთვის გამოყენებული იქნება ევროკავშირის ინდიკატორები, იმის გათვალისწინებით თუ რა სტატისტიკური მონაცემებია ხელმისაწვდომი აჭარაზე.