აშშ-ის პრეზიდენტი დონალდ ტრამპი ირანს ომანის ყურეში ნავთობის ტანკერებზე თავდასხმაში ადანაშაულებს.

ირანი ბრალდებას კატეგორიულად უარყოფს.

 „ეს ნამდვილად ირანმა გააკეთა და თქვენ იცით, რომ მათ გააკეთეს ეს, რადგან თქვენ დაინახეთ კატერი“, - განაცხადა ტრამპმა ტელერხ Fox-თან ინტერვიუში და აჩვენა ვიდეო, სადაც მისი თქმით, ირანელი სამხედროები იღებენ აუფეთქებელ ნაღმს დაზიანებული ტანკერიდან.

მანამდე ირანის საგარეო საქმეთა მინისტრმა მუჰამედ ჯავად ზარიფმა განაცხადა, რომ აშშ-ის ბრალდება უსაფუძვლოა.

ირანული და არაბული მედიის ცნობით, ოთხშაბათს ომანის ყურეში ნავთობის ორ ტანკერზე თავდასხმა მოხდა. ზოგიერთი მონაცემით, ტანკერებს ტორპედო დაეჯახა, რის შედეგადაც ხომალდებზე აფეთქებები მოხდა და ხანძარი გაჩნდა. თუმცა ეს ვერსია ოფიციალურად ჯერ არ დადასტურებულა. ორივე ტანკერის ეკიპაჟის წევრები ირანის ტერიტორიაზე გადაიყვანეს.