შეწყალების კომისიის ყოფილი თავმჯდომარე ალეკო ელისაშვილი აცხადებს, რომ ე.წ. შეწყალების საქმესთან დაკავშირებით, პროკურატურა მხოლოდ მისი მტკიცებულებების იმედზეა. პროკურატურაში შესვლამდე მან ასევე განაცხადა, რომ გამოძიებას ამ დრომდე არ მოუთხოვია "მაგთიდან" მისი სატელეფონო საუბრის ჩანაწერები.

"ამ საქმეს პროკურატურა ორი კვირაა იძიებს და არ მოუთხოვიათ "მაგთიდან" ჩემი სატელეფონო ამონაწერი, სანამ ეთერში არ ვაფრიალე. დღეს დამირეკა პროკურორმა გიორგი მუჯირმა და მითხრა, იქნებ მოიტანოო. ვკითხე, თქვენ რატომ არ მოითხოვეთ ამდენი ხნის განმავლობაშიმეთქი და მითხრა, იქნებ თქვენ თვითონ მოიტანოთო. ეს არაპროფესიონალიზმი კი არა, სირცხვილია. ამონაწერი არის ოფიციალური მტკიცებულება, რომელიც ადასტურებს, შემოვიდა თუ არა ჩემთან იმ პოლიტიკოსისგან მესიჯები. მე არ მეზარება პროკურატურაში სიარული და რამდენჯერაც საჭირო იქნება მივალ, მაგრამ გამოდის, რომ პროკურატურა არის მარტო ჩემი მტკიცებულებების იმედად. თურმე ამ ხალხს, აქ რომ სხედან, ამ უსაქმურებს, იმიტომ ვუხდით ხელფასს, რომ ელისაშვილმა მოუტანოს მტკიცებულებები? ", - განაცხადა ელისაშვილმა.

მისივე თქმით, არ თვლის საჭიროდ დაასახელოს პიროვნება, რომელმაც მაღალჩინოსნების მიერ შეწყალების საქმეზე 200 000 ლარის მიღების შესახებ მიაწოდა ინფორმაცია.