“კაი დღეში ხარ ახლა, იცინე!” – ქუთაისის საკრებულოს დეპუტატმა და ფრაქცია ქართული ოცნება-კონსერვატორების თავმჯდომარემ, ნანა კოსტავამ სოციალური მედიის მენეჯერ სალომე ბარკერის 2018 წლის ერთ-ერთი  პოსტი გააზიარა.  

პოსტში, რომელიც მან გააზიარა, სალომე ბარკერს თითებზე პრეზერვატივი აქვს გაკეთებული, რითიც კომპანია "აიისას" საქმეზე მოსამართლე ლევან მურუსიძის მიერ მიღებულ გადაწყვეტილებას აპროტესტებს. ამჟამად პოსტი უკვე წაშლილია.

როგორც ცნობილია, სალომე ბარკერის 16 წლის და რამდენიმე დღის  წინ ლაგოდეხის ნაკრძალში დაიღუპა.

მოგვიანებით ნანა კოსტავამ სტატუსი გამოაქვეყნა, სადაც დაწერა, რომ არ იცოდა სალომე ბარკერის ტრაგედიის შესახებ და ბოდიში მოიხადა.

“ჩემო მეგობრებო, ნამდვილად არ ვიცოდი სალომე ბარკერის ოჯახზე თავსდამტყდარი უბედურება… ვუსამძიმრებ მის ოჯახს და განვიცდი ნამდვილად, მე ჩემი მენტალობიდან გამომდინარე ვებრძვი ჩემი გვერდიდან ქართული ფასეულობებისა და მართლმადიდებლობის შეურაცხმყოფელ ვიდეოებსა და გამონათქვამებს, ჩემი პოსტიც ამას ემსახურებოდა და მეტს არაფერს, მეც შვილების დედა ვარ და ზუსტად ისეთივე შოკს და ტრაგედიას განვიცდი , რასაც ეს ოჯახი. მომიტევეთ და მაპატიეთ,” – წერს ნანა კოსტავა.

სოციალურ ქსელში ეს პოსტიც ამ დროისთვის უკვე აღებულია.