17 მაისს, თბილისში, რესპუბლიკის მოედნიდან სამების საკათედრო ტაძრისკენ სამღვდელობა მსვლელობას მოაწყობს, - ამის შესახებ ნათქვამია ვიდეომიმართვაში, რომელიც დღეს გავრცელდა.

სამღვდელობა საზოგადოებას მოუწოდებს, შეუერთდნენ მათ მსვლელობას.

"ძმანო და დანო! 17 მაისი ოჯახის სიწმინდის დღეა. მოგეხსენებათ, რომ ქრისტანული ოჯახი მცირე ეკლესიაა, სწორედ ამიტომ, დემონურმა ძალებმა განსაკუთრებული ბრძოლა გამოაცხადეს ოჯახის ინსტიტუტს სხვადასხვა მეთოდით და საშუალებით. თუნდაც იმით, რომ ოჯახის იმიტაციას ახდენენ სოდომური ცოდვის შერწყმით და ასე განზოგადებით ოჯახისა, რაც არის უმძიმესი ცოდვა. დანაშაული ღვთის, ადამიანის, ზნეობის, ოჯახის ინსტიტუტის წინაშე.

აქედან გამომდინარე, რამდენიმე წლის წინ მისი უწმინდესობის ლოცვა კურთხევით, დადგინდა სწორედ ოჯახის სიწმინდის დღე და განისაზღვრა მისი თარიღი 17 მაისი. ჩვენ ვაწყობთ მსვლელობას, პარასკევს, 17 მაისს, 10 საათიდან ვიკრიბებით რესპუბლიკის მოედანზე სამღვდელოება, მრევლი, საზოგადოება. აღვასრულებთ სავედრებელ პარაკლისს ყოვლადწმინდა ღვთისმშობლის მიმართ და შემდეგ მოეწყობა მსვლელობა სამების საკათედრო ტაძრისკენ. შემოგვიერთდით.", - ნათქვამია ვიდეომიმართვაში.

17 მაისი ჰომოფობიასთან და ტრანსფობიასთან ბრძოლის საერთაშორისო დღეა.

ლგბტქი თემი 17 ღონისძიების გამართვას არ გეგმავს. მათი თქმით, ჰომოფობიასთან და ტრანსფობიასთან ბრძოლის დღე პოლიტიკურმა და რელიგიურმა ექსტრემისტულმა ჯგუფებმა მიისაკუთრეს და ლგბტქი ადამიანებისთვის ქუჩაში უსაფრთხო სივრცე აღარ დატოვეს.

17 მაისს სამების ეზოში ოჯახის სიწმინდის დღისადმი მიძღვნილი კონცერტი გაიმართება.