ჰორიზონტალურად გაშვერილი საკვამლე მილები ინდივიდუალური ბინებიდან ძალიან მავნებელია მოსახლეობისათვის, - ამის შესახებ ნათქვამია საქართველოს პარლამენტის გარემოს დაცვისა და ბუნებრივი რესურსების კომიტეტის მიერ თბილისში ატმოსფერული ჰაერის დაბინძურების ძირითადი წყაროების შესახებ ჩაატარებული პირველი თემატური მოკვლევის ანგარიშში.

ანგარიშში აღნიშნულია, რომ აუცილებელია, მრავალსარ­თულიანი სახლების ევროპული ტიპის კოლექტიური საკვამლე მილებით აღჭურვა.

„ევროპული კანონმდებლობა მოითხოვს, რომ კვამლი ატმოსფეროს მაღალ ფენებში უნდა გაიფრქვას. თბილისში და მთლიანად საქართველოში ასეთ კვამლს მოსახლეობა ჩაისუნთქავს გამათბობელი ქვაბების საკვამლე მილების არასწორად დამონტაჟების გამო. ­ მარტივი და იაფი, ჰორიზონტალურად გაშვერილი საკვამლე მილები ინდივიდუალური ბინებიდან ძალიან მავნებელია მოსახლეობისათვის.

ევროპაში მრავალსართულიან საცხოვრებლებში კედლის ქვაბებიდან სათბობის წვის პრო­დუქტების (კვამლის) ემისიისათვის ე.წ. კოლექტიური საკვამლე მილები კეთდება, ინდივიდუალური საკვამურების მოწყობა დაუშვებელია“, - ნათქვამია ანარიშში და აღნიშნულია, რომ ეკონომიკისა და მდგრადი განვითარების სამინისტროს მიერ მომზადებული კანონპროექტი შენობების ენერგოეფექტურობის შესახებ ითვალისწინებს, რომ 2019 წლის 31 დეკემბრის შემდეგ ენერგოეფექტიანობის სერტიფიცირების გარეშე სამშენებლო ნებართვები აღარ გაიცეს.

„ბუნებრივ აირზე მომუშავე კედლის ქვაბებიდან წარმოქმნილი წვის პროდუქტების (კვამლის) სახურავის მაღლა ემისიისათვის, თბილისში/საქართველოში უნდა დამონტაჟდეს ევროპული ტიპის „კოაქსიალური“ კონსტრუქციის კოლექტიური საკვამლე მილები, ძველ თუ ახალაშენებულ სახლებში. ეს მნიშვნელოვანია ქალაქის საცხოვრებელ სექტორში ენერგო­ეფექტურობის ასამაღლებლად, ასევე, მოსახლეობის ჯანმრთელობისა და გარემოს დაცვის მიზნით”, - ნათქვამია ანგარიშში.