შრი-ლანკის პოლიციამ ქვეყნის ცენტრალურ ნაწილში  ტერორისტული დაჯგუფება „ჯამაათ ათ-თაუჰიდ ალ-ვათანიას“ საწვრთნელი ბაზა აღმოაჩინა.

ადგილობრივი მედიის ცნობით, ბაზა ქალაქ ნუვარ-ელიაში ორსართულიან შენობაში იყო განთავსებული. ბაზაზე წვრთნას სულ მცირე 38 ადამიანი გადიოდა, მათ შორის კოლომბოში აფეთქებების სერიის უშაულო ორგანიზატორი. პოლიციამ შენობის მფლობელი დააკავა, ადგილზე საგამოძიებო ღონისძიებები მიმდინარეობს.

21 აპრილს, როდსეაც კათოლიკეები აღდგომას აღნიშნავდნენ, შრი-ლანკაში ტერაქტების სერია მოხდა. ქალაქებში კოლომბოში, ნეგომბოსა და ბატიკალოაში რვა აფეთქება მოხდა, მათ შორის ეკლესიებსა და სასტუმროებში. ტერაქტების შედეგად დაიღუპა 250 ადამიანი.

აფეთქებების უკან დგას ადგილობრივი დაჯგუფება „ჯამაათ ათ-თაუჰიდ ალ-ვათანია“, რომელსაც შესაძლოა, კავშირი ჰქონდეს უცხოეთში ისლამისტურ დაჯგუფებებთან. ამ დროისათვის ხელისუფლებამ უკვე დააკავა 100-ზე მეტი ადამიანი.