ვიეტნამის მოქალაქე, რომელსაც ბრალი ჩრდილოეთ კორეის ლიდერის კიმ ჩენ ინის ძმის, კიმ ჩენ ნამის მკვლელობაში ედებოდა, მალაიზიის სასამართლომ პატიმრობიდან გაათავისუფლა. იუწყება Reuters-ი.

30 წლის დოან თჰი ჰიონგის ადვოკატმა სააგენტოს განუცხადა, რომ ის სამშობლოში დღესვე დაბრუნდება.

მალაიზიის უმაღლესმა სასამრთლომ 1 აპრილს დოან თჰი ჰიონგის საქმე  გადააკვალიფიცირა და მას ბრალი ჯანმრთელობისთვის განზრახ ზიანის მიყენებისთვის წაუყენა.

შედეგად ქალს სამი წლითა და ოთხი თვით პატიმრობა მიესაჯა. როგორც ადვოკატმა განმარტა, მან სასჯელის ნაწილი უკვე მოიხადა. მარტში სასამართლო დარბაზიდან გათავისუფლდა მეორე ეჭვმიტანილი ქალი, ინდონეზიის 26 წლის მოქალაქე სიტი აისია.

კიმ ჩენ ნამს თავს  კუალა-ლუმპირის აეროპორტში 2017 წლის 13 თებერვალს დაესხნენ. არსებული ინფორმაციით, მას სახეზე ნერვულ-პარალიტური ნივთიერებით გაჟღენთილი ცხვირსახოცი სახეზე დაადეს. ქალებმა სასამართლოში განაცხადეს, რომ არ იცოდნენ შხამიანი ცხვირსახოცის შესახებ და დარწმუნებულნი იყვნენ, რომ სატელევიზიო შოუში მონაწილეობდნენ, რისთვისაც ისინი მანამდე უცნობმა მამაკაცებმა დაიქირავეს. მალაიზიის პოლიციამ მამაკაცების იდენტიფიცირება მოახდინა, ისინი ჩრდილოეთ კორეის მოქალაქეები აღმოჩნდნენ, რომლებმაც ქალების დაპატიმრების მომენტში ქვეყანა დატოვეს. კიმ ჩენ ნამი საავადმყოფოში მიყვანამდე გარდაიცვალა.