მოძრაობა „თალიბანმა“ ავღანეთში საგაზაფხულო თავდასხმების დაწყების შესახებ განაცხადა.

 „ჩვენი მოვალეობები ჯიხადთან დაკავშირებით ჯერ კიდევ არ შესრულებულა. იმის მიუხედვად, რომ ჩვენი სამშობლოს მნიშვნელოვანი ნაწილი მტრებისგან თავისუფალია, ოკუპანტები ჯერ კიდევ განაგრძობენ სამხედრი და პოლიტიკური გავლენის დამყარებას ჩვენს მუსულმანურ ქვეყანაზე“, - ნათქვამია თალიბების განცხადებაში.

„თალიბანის“ ოპერაცია „გამარჯვება“ ავღანეთის მთელს ტერიტორიაზე ჩატარდება.

ავღანეთის თავდაცვის სამინისტროს წარმომადგენელმა ამასთან დაკავშირებით აღნიშნა, რომ თალიბების განცხადება „წმინდა წყლის პროპაგანდაა“. „თალიბანს“ არ შეუძლია თავისი მიზნის მიღწევა და მათი ყველა ოპერაცია დამარცხებისთვის არის განწირული, როგორც ეს გასულ წლებში იყო“, - განაცხადა მან.

თალიბებმა აღნიშნული განცხადება იმ პირობებში გაავრცელეს, როდესაც „თალიბანი“ და აშშ მოლაპარაკებებს აწარმოებენ ავღანეთში მშვიდობის დამყარების საკითხის თაობაზე.