საბურთალოს რაიონის გამგებელმა ბექა მიქაუტაძემ  2014 წლის სექტემბრიდან  2015 წლის ბოლომდე გამგეობის მუშაობის ანგარიში წარადგინა.

ანგარიშის მიხედვით,   საბურთალოს რაიონში  გზის კეთილმოწყობის სამუშაოები 164 ობიექტზე ჩატარდა . აღნიშნულ  პროექტებზე 5 600 000 ლარი დაიხარჯა;  მოეწყო 27 საყრდენი კედელი და შესაბამისად, თავიდან იქნა აცილებული მნიშვნელოვანი ზარალი. 2 731 934   ლარის ღირებულების სოციალური დახმარება გაეწია 10 669 მოქალაქეს.  კეთილმოეწყო 5 უფასო სასადილო, რომელიც 1645 ბენეფიციარს ემსახურება;  4 044 505  ლარით დაფინანსდა ბინათმესაკუთრეთა ამხანაგობების 585 პროექტი.

ბექა მიქაუტაძემ გამგეობის მუშაობის გამჭვირვალობასა  და  მის საქმიანობაში  საზოგადოებრივი საბჭოების ჩართულობაზეც ისაუბრა.  ასევე, შეეხო სამომავლო გეგმებს.

მისი თქმით, განხორციელებული პროექტების მასშტაბურობის  მიუხედავად, ბევრი გამოწვევა რჩება და გამგეობა მომავალი წლიდან კიდევ უფრო აქტიურად იმუშავებს რაიონის ინფრასტრუქტურის გაუმჯობესებაზე.

დავით ნარმანიას თქმით, ამ პერიოდის განმავლობაში,  საბურთალოს რაიონის გამგეობა ძალიან აქტიურად მუშაობდა.

„შედეგიც სახეზეა: გაკეთდა შიდა კვარტალური გზები, მოწესრიგდა საერთო სარგებლობის ეზოები, ბავშვთა სათამაშო მოედნები. 13 – 14 ივნისის სტიქიის შემდეგ გამგეობის ნაწილობრივი ჩართულობით, განხორციელდა აღდგენითი სამუშაოები. მნიშვნელოვანია ის, რომ გამგეობის საქმიანობაში საზოგადოებაა  ჩართული და გამგეობაში არსებობს სათათბირო საბჭო, სადაც გადაწყვეტილების მიღებამდე, განიხილება ესა თუ ის საკითხი.  ანგარიშსაც ვაბარებთ ხალხს“, -განაცხადა დავით ნარმანიამ.

ანგარიშის წარდგენას საბურთალოს რაიონის მაცხოვრებლები,  საზოგადოებრივი საბჭოების წარმომადგენლები, თბილისის მთავრობისა და დედაქალაქის საკრებულოს წევრები ესწრებოდნენ.