იტალიის ქალაქ ანკონის სასამართლომ ორი მოძალადე გაამართლა და ვერდიქტის არგუმენტად მსხვერპლის არამიმზიდველობა დაასახელა.

გაუპატიურების მსხვერპლმა, პერუს მოქალაქემ იტალიის სასამართლოს 2015 წელს მიმართა. ის ამტკიცებდა, რომ მისმა ორმა თანამემამულემ მას სასმელში ნარკოტიკი ჩაუყარა და გააუპატიურა. მისივე თქმით, ვიდრე ერთ-ერთი მათგანი მას აუპატიურებდა, მეორე ტერიტორიას ათვალიერებდა, რომ გამვლელს მათთვის ხელი არ შეეშალა. 2016 წელს სასამართლომ გამამტყუნებელი განაჩენი გამოიტანა, თუმცა ერთი წლის შემდეგ ეს განაჩენი გააუქმა.
მოსამართლეებმა ქალის საჩივარს გადახედეს და გადაწყვიტეს, რომ ის მამაკაცებისთვის იმდენად არასასურველი და არამიმზიდველი იყო, რომ მისი გაუპატიურება არავის მოუნდებოდა. მტკიცებულებად გამოიყენეს ერთ-ერთი ეჭვმიტანილის სატელეფონო წიგნის ჩანაწერი, სადაც ქალი „ვიკინგის“ მეტსახელით არის მოხსენიებული და ქალის ფოტოსურათი.

ანკონის სასამართლოს შენობასთან 200-მდე ადგილობრივი მცხოვრები შეიკრიბა და სასამართლოს გადაწყვეტილება გააპროტესტა.