ბობოყვათის რეზიდენცია არის ჩვენი ქვეყნის შავი ზღვის სანაპიროზე ყველაზე მნიშვნელოვანი საინვესტიციო ობიექტი, რომელიც ხალხის სამსახურში უნდა ჩამდგარიყო ადრე თუ გვიან, - ასე ეხმიანება ეკონომიკური განვითარების ცენტრის ხელმძღვანელი, რომან გოცირიძე კრწანისის ტყე-პარკის სანაცვლოდ, ბობოყვათის სამთავრობო რეზიდენციის საპატრიარქოსთვის გადაცემის ფაქტს.

”როცა აჭარის ოდიოზური მმართველი ამბობს, რომ მყიდველი ვერ მოიძებნაო, ეს არის ერთუჯრედიანი ტყუილი. მისი საპატრიარქოსათვის გადაცემა არის ამ მთავრობის სიმახინჯის კიდევ ერთი დადასტურება და კორუფციული ჩახლართული სქემის შემადგენელი ნაწილი. თავის დროზე კრწანისის ტყე-პარკის ( რომელიც ბობოყვათში გაიცვალა) საპატრიარქოსთვის გადაცემაც იყო შეცდომა და იგი საარჩევნოდ ეკლესიის გამოყენებას ემსახურებოდა. როგორ შემოუბრუნდა ეს ”ზრუნვა” წინა ხელისუფლებას, კარგად დავინახეთ. ახლა ცოტა სხვანაირადაა საქმე. ორ კურდღელს იჭერენ. პარტიისთვის მრევლის ხმებს, ცალკეული წევრებისათვის-ფულს”, - აღნიშნავს რომან გოცირიძე.

პრემიერ-მინისტრის განკარგულებით, ბობოყვათის სამთავრობო რეზიდენცია 49- წლიანი უზუფრუქტის უფლებით სამოციქულო ავტოკეფალურ მართლმადიდებელ ეკლესიას გადაეცა. სანაცვლოდ, სახელმწიფო „კრწანისის პარკის“ 100%–იან წილს, ასევე საწარმოს კაპიტალში რიცხული ქონებას იბრუნებს.

რატომ მიიღო მთავრობამ ეს გადაწყვეტილება, ამ დრომდე საზოგადოებისთვის განმარტება არ გაკეთებულა.

აღსანიშნავია, რომ ბობოყვათის სამთავრობო რეზიდენცია მთავრობამ საპრივატიზებო ობიექტების ნუსხაში ამ გაზაფხულზე, ქვეყანაში სავალუტო ნაკადების მკვეთრი შემცირების დასაბალანსებლად შეიტანა. ასევე საპრივატიზაციო ობიექტების ნუსხაში იყო ეროვნული ბანკის ყოფილი შენობა.