5 სექტემბერს ფოთში მომხდარი აფეთქებისას დაშავებული ახალგაზრდა მამაკაცი ზუგდიდის რეფერალურ ჰოსპიტალში გარდაიცვალა.

ჰოსპიტლის კლინიკური დირექტორის, სულხან ორჟონიას განცხადებით, პაციენტი იმყოფებოდა მართვით სუნთქვაზე, თუმცა ტრავმა აღმოჩნდა სიცოცხლესთან შეუთავსებელი და 12:00 საათზე დაფიქსირდა ბიოლოგიური სიკვდილი.

„მამაკაცი გადმოყვანილ იქნა ფოთის კლინიკიდან კატასტროფის სამსახურის მიერ, დიაგნოზით – დაუზუსტებელი ფეთქებადი ნივთიერების მიერ მიყენებული სხეულის მრავლობითი დაზიანებით, ქალა-ტვინის ტრავმა, თავის ტვინის დაჟეჟილობა, თავის ტვინის შეშუპება, ტრავმული სუბარაქნოიდული და სუბდურული სისხლჩაქცევა, გულმკერდის დახურული ტრავმა, ფილტვების დაჟეჟილობა, მარჯვენამხრივი პნევმოთორაქსი, მარჯვენა წინამრის ფრაგმენტული მოტეხილობა. ავადმყოფს ჩაუტარდა ტრეპანაცია, პლევრის ღრუს დრენირება, წინამხრის ამპუტაცია. იმყოფებოდა მართვით სუნთქვაზე, თუმცა ტრავმა აღმოჩნდა სიცოცხლესთან შეუთავსებელი და 12:00 საათზე დაფიქსირდა ბიოლოგიური სიკვდილი“, – განაცხადა სულხან ორჟონიამ. (მის კომენტარს საზოგადოებრივი მაუწყებელი ავრცელებს).

ცნობისთვის, ფოთში, ნაბადის უბანში აფეთქება 5 სექტემბერს, განთენიისას მოხდა.