ინდონეზიის რესპუბლიკაში ვიზიტით მყოფმა საქართველოს საპარლამენტო დელეგაციამ, რომელსაც დავით უსუფაშვილი ხელმძღვანელობს, შეხვედრა ქვეყნის პოლიტიკის, იუსტიციისა და უსაფრთხოების მინისტრთან, ლუჰუტ პანგარიბუანთან გამართა. 

შეხვედრაზე ორ ქვეყანას შორის სამომავლო თანამშრომლობის, საქართველოს მიერ დემოკრატიული განვითარების გზაზე მიღწეული წარმატებებისა და მისი რეგიონულ პარტნიორებთან ურთიერთობის შესახებ ისაუბრეს. დავით უსუფაშვილის განცხადებით, საქართველოს მისწრაფება ევროკავშირში ინტეგრაციაა, თუმცა, ის ასევე დაინტერესებულია აზიის ქვეყნებთან ურთიერთობით.

მისივე თქმით, საქართველოს პარლამენტი ორ ქვეყანას შორის ურთიერთობის გაღრმავებას აქტიურად შეუწყობს ხელს და ამ მიზნით, საქართველოს უმაღლეს საკანონმდებლო ორგანოში ინდონეზიის რესპუბლიკის პარლამენტთან მეგობრობის ჯგუფი შეიქმნება. როგორც შეხვედრაზე აღინიშნა, საქართველოს საპარლამენტო დელეგაციის ვიზიტი ინდონეზიის რესპუბლიკაში ქვეყნებს შორის ურთიერთობის გაღრმავებას ხელს შეუწყობს და სხვადასხვა მიმართულებით თანამშრომლობას ჩაუყრის საფუძველს.

ინდონეზიის პოლიტიკის, იუსტიციისა და უსაფრთხოების მინისტრმა ქვეყანაში მიმდინარე პროცესების შესახებ ისაუბრა და აღნიშნა, რომ ეკონომიკური მაჩვენებლის გაზრდის მიზნით, ინდონეზია გეგმავს, მწარმოებელი ქვეყანა გახდეს. ლუჰუტ პანგარიბუანმა საქართველოსთან თანამშრომლობისთვის მზადყოფნა გამოთქვა.