საქართველოს თურქეთის საგარეო საქმეთა მინისტრი ეწვევა. მოპატიჟება მევლუთ ჩავუშოღლუმ პირადად გიორგი კვირიკაშვილისგან მიიღო.

მევლუთ ჩავუშოღლუ და გიორგი კვირიკაშვილი ერთმანეთს ნატო-ს მინისტერიალის ფარგლებში შეხვდნენ.

მინისტრებმა დაადასტურეს ორი ქვეყნის სტრატეგიული პარტნიორობა და მჭიდრო თანამშრომლობა, მათ შორის საერთაშორისო ენერგეტიკულ და სატრანზიტო პროექტებში. ისაუბრეს ბაქო-თბილისი-ყარსის პროექტის მნიშვნელობაზე. 
მინისტრებმა მიმოიხილეს რეგიონში არსებული უსაფრთხოების გარემო. 

თურქეთის საგარეო უწყების ხელმძღვანელმა კიდევ ერთხელ ღიად დაადასტურა ოფიციალური ანკარის მხარდაჭერა საქართველოს ევროპული ინტეგრაციის, ქვეყნის ნატო–ში გაწევრიანების მიმართ. საქართველოს საგარეო საქმეთა მინისტრმა თურქ კოლეგას გააცნო საქართველოს პროგრესი როგორც ევროკავშირთან ასოცირების შეთანხმების შესრულების მიმდინარეობაზე, ასევე ნატო–ს არსებითი პაკეტის იმპლემენტაციის და წლიური სამოქმედო გეგმის შესრულების თვალსაზრისით. 

აღინიშნა სამმხრივ ფორმატში (აზერბაიჯანი, თურქეთი, საქართველო) თანამშრომლობის მნიშვნელობა და ბოლო პერიოდში არსებული წარმატებული დინამიკა. 

შეხვედრის დასასრულს საქართველოს საგარეო საქმეთა მინისტრმა თურქი კოლეგა სამმხრივ  შეხვედრაში მონაწილეობის მიზნით საქართველოში მოიწვია.