ეკონომიკისა და მდგრადი განვითარების მინისტრი მომავალი წლის ბიუჯეტში პენსიების ზრდასთან დაკავშირებით, განმარტებას აკეთებს. დიმიტრი ქუმსიშვილის განცხადებით, 2016 წლის ბიუჯეტი, როგორც საგადასახადო შემოსავლების ნაწილში, ასევე დეფიციტურ მუხლებში, გაიზარდა და გადაწყდა, რომ პენსიები გაზრდილიყო.
,,ჯამში ეს არის 215 მილიონი დოლარი და პრიორიტეტების მიხედვით გადანაწილდა. მინდა აღვნიშნო, რომ ყველა ინფრასტრუქტურული პროექტი, რაც იყო წამოწყებული, ასევე, ბიზნესის ხელშეწყობის პროექტი გაგრძელდება და უფრო გაფართოვდება. რაც შეეხება კონკრეტულად, ჩვენ უწყებას, გვექნება საკმაო ზრდა ტურიზმის ნაწილში“, - განაცხადა მინისტრმა.
როგორც მთავრობის დღევანდელ სხდომაზე გახდა ცნობილი, 2016 წლის 1 ივლისიდან პენსია 180 ლარი გახდება. პენსიის ზრდა მომავალი წლის ბიუჯეტის პროექტის პირველად ვარიანტში გათვალისწინებული არ იყო.