იმის მიუხედავად, რომ მეგან მარკლის ნათესავები ამტკიცებდნენ, რომ ის ბავშვობიდან პრინცესობაზე ოცნებობდა, სასახლეში ცხოვრება მას ზღაპრად არ ეჩვენება. ინსაიდერის თქმით, ყოფილ მსახიობს ნიუ-იორკში გატარებული ცხოვრება ენატრება და დღემდე ვერ ეგუება ახალ პირობებს. როგორც ცნობილია, პრინც ჰარის საცოლემ უარი თქვა მსახიობის კარიერაზე, დაიწყო სამეფო ეტიკეტის შესწავლა, გააუქმა ყველა გვერდი სოციალურ ქსელში. ამ უკანასკნელთან გამომშვიდობება კი ძალიან გუჭირდა.

„მას ძალიან ენატრება მეგობრები და თაყვანისმცემლები, რომლებსაც ადრე სოციალურ ქსელებში ეკონტაქტებოდა. მეგანს არ უფიქრია, რომ ამ ყველაფრის მიტოვება მისთვის ამდენად რთული იქნებოდა“, - ამბობს ინსაიდერი.

მისივე თქმით, მეგანი ვერ ეგუება დამღლელ პოპულარობას, რომელიც თავს პრინცთან ნიშნობის შემდეგ დაატყდა.

„ახლა ის ძაღლთან ერთად ვეღარ სეირნობს, მაკიაჟის გარეშე გამოსვლა ეკრძალება და მაღაზიაში შაქარს ვერ ყიდულობს“, - აღნიშნა მან.

მეგანისა და ჰარის ქორწილი 19 მაისს გაიმართება.