დღეს 20:00  საათზე, სასტუმრო „რედისონში,“  საქართველოს პირველი ლედი მაკა ჩიჩუა, ორსულთა პათოფიზიოლოგიის 47-ე საერთაშორისო კონგრესს გახსნის და შეკრებილ საზოგადოებას სიტყვით მიმართავს.

ორსულთა პათოფიზიოლოგიის  საერთაშორისო კონგრესი საქართველოს პრეზიდენტის ფონდის მხარდაჭერით და საქართველოს პირველი ლედის პატრონაჟით იმართება.

კონგრესის მიზანია ხელი შეუწყოს დედათა და ბავშვთა ჯანმრთელობის დაცვის სრულყოფას, მუცლად ყოფნის პერიოდიდან ბავშვის შესაძლო დაავადებების ეფექტურ პროგნოზირებას და პრევენციას.

კონგრესში მონაწილეობის მისაღებად მსოფლიო ჯანდაცვის ორგანიზაციებისა და ასოციაციების 40-მდე წარმომადგენელი ჩამოვიდა საქართველოში, რომლებიც ორსულთა და მათ მომავალ ბავშვთა დაავადებების შესწავლისა და მკურნალობის დარგში მოღვაწოებენ. კონგრესის ფარგლებში დაგეგმილია ასევე იან დონალდის სახელობის საერთაშორისო საუნივერსიტეტო სკოლის სპეციალური კურსები ულტრასონოგრაფიაში.

კონგრესი გაიმართება 19-21 ნოემბერს და მასში მონაწილეობას საქართველოს მასშტაბით მედიკოსები მიიღებენ.

ორსულთა პათოფიზიოლოგიის 47-ე საერთაშორისო კონგრესის ორგანიზატორები საქართველოს მეცნიერთა და სპეციალისტთა ასოციაციის მედიცინის დეპარტამენტი, საქართველოს მეან-გინეკოლოგთა ასოციაცია, საქართველოს ნაყოფის მედიცინის ფონდი და საქართველოს პრენატალური მედიცინის და პერინატოლოგიის ასოციაცია არიან.