ამერიკელმა ქირურგებმა სახის გადანერგვის ოპერაცია გააკეთეს. 41 წლის მეხანძრეს პატრიკ ჰარდისონს სახის ქსოვილების რეკორდული რაოდენობა გადაუნერგეს. მისი ხანძრისგან დამახინჯებული სახე დონორის სახით შეცვალეს, ოპერაცია 26 საათს გაგრძელდა.

ჰარდისონმა 2001 წელს სერიოზული დამწვრობა იმ დროს მიიღო, როდესაც ცეცხლმოკიდებული ავტომისაბმელიდან ქალის გამოყვანას ცდილობდა. შემთხვევის შემდეგ მეხანძრემ მხედველობა დაკარგა, მისი სახის ყველა დამახასიათებელი ნაკვთი კი დამახინჯდა. უკანასკნელი 14 წლის განმავლობაში მას 71 ოპერაცია გაუკეთდა, მაგრამ უშედეგოდ.

სახის დონორი 26 წლის ნიუ-იორკელი მხატვარი დევიდ როდებაუ გახდა. ოპერაციამდე ერთი წლით ადრე ის საავადმყოფოში საგზაო შემთხვევის შედეგად მიღებული ტრავმებისგან გარდაიცვალა. ოპერაციისთვის როდებაუს სახის გამოყენებაზე დედამისმა თანხმობა განაცხადა.

ოპერაციის დროს ქირურგებს პაციენტის თავის ქალის შეცვლა მოუწიათ, რათა მისი ახალი სახე თავის ქალას კარგად მორგებოდა. უახლოეს ხანებში ჰარდისონს მხედველობაც უნდა დაუბრუნდეს.

მედიცინაში ეს პირველი შემთხვევაა, როდესაც ადამიანს დიდი რაოდენობით სახის ქსოვილები გადაუნერგეს. მანამდე ნაწილობრივი გადანერგვის ოპერაცია არაერთხელ გაკეთდა. პირველი პაციენტი, რომელსაც 2005 წელს სახის ქსოვილი გადაუნერგეს, ფრანგი იზაბელ დინუარი იყო.