აჭარაში კერძო პირდაპირი ინვესტიციების მოცულობა 42%-ითა გაზრდილი. აჭარის მთავრობის მეთაურმა არჩილ ხაბაძემ მთავრობის 3 წლის ანგარიშის წარდგენისას განაცხადა, 2015 წლის 9 თვეში რეგიონში ინვესტიციების მოცულობამ 259,9 მლნ ლარი შეადგინა, რაც გასული წლის ანალოგიურ პერიოდთან შედარებით 76.5 მილიონი აშშ დოლარით, ანუ 42%-ითა გაზრდილი.

2014 წლის იანვარ-სექტემბერში აჭარაში განხორციელებული ინვესტიციები 183,4 მლნ დოლარით განისაზღვრა.

მიმდინარე წელს რეგიონში განხორციელებული ინვესტიციების, ყველაზე მეტი 39 %-ი ენერგეტიკაზე მოდის. ტურიზმს რეგიონში განხორციელებული ინვესტიციების 35 %-ი უკავია, ხოლო მშენებლობის დარგი მიმდინარე წელს ინვესტიციების 19 %-ს დასჯერდა. სოფლის მეურნეობა და მრეწველობა მთლიან ინვესტიციებში თანაბრად 1-1 %-ს ინარჩუნებენ. სხვა დარგებზე კი მთლიანი ინვესტიციების 5 %-ი მოდის.

„მინდა ხაზი გავუსვა, რომ ენერგეტიკაში განხორციელებული ინვესტიციები ბოლო პერიოდში მზარდია. თუ წინა წლებში წამყვან პოზიციებზე ტურიზმი და მშენებლობა იყო, წელს უკვე ენერგეტიკის სფერო ლიდერობს“, აღნიშნა არჩილ ხაბაძემ.

სტატისტიკური ინფორმაციის მიხედვით, 2015 წლის 9 თვეში აჭარაში განხორციელებული ინვესტიციები 125.2 %-ით (144.5 აშშ დოლარით) მეტია 2012 წლის ანალოგიურ მაჩვენებლებთან შედარებით და ასევე 76.9 %-ით (113 აშშ დოლარით) მეტია 2013 წლის ანალოგიური პერიოდის მაჩვენებლებთან.