პარიზის ტერაქტთან დაკავშირებით საერთაშორისო ძებნა გამოცხადდა საფრანგეთის ერთ მოქალაქეზე, 26 წლის სალეჰ აბდეს-ლამზე, რომელიც ქვეყანაში ბელგიის ტერიტორიიდან შევიდა და ტერაქტებში თავის ორ ძმასთან ერთად მონაწილეობდა.

ფრანგი სამართალდამცველები მიიჩნევენ, რომ სალაჰი აბდესლამი, სავარაუდოდ, ერთადერთი გადარჩენილი თავდამსხმელია, რომელმაც მიმალვა შეძლო. 
სალაჰ აბდესლამის გარდა, გამოძიება შემდეგ პირებს ასახელებს: ბრუსელის მკვიდრი მუჰამედ აბდესლამი, რომელიც ბელგიაში დააკავეს, 31 წლის ბრაჰიმ აბდესლამი და 20 წლის ბილალ ჰადფი, რომლებიც თავდასხმების დროს დაიღუპნენ, ასევე პარიზის მკვიდრი 29 წლის ისმაილ ომარ მოსტეფა, რომელიც ბატაკლანის საკონცერტო დარბაზზე თავდასხმისას დაიღუპა. საფრანგეთის ქალაქ კურკორონის მკვიდრი ომარ მოსტეფა, ბოლო წლებში მეჩეთში ხშირად დადიოდა. პარიზის პროკურორის ფრანსუა მოლენის ინფორმაციით, 2004-2006 წლებში მოსტეფამ რამდენიმე დანაშაული ჩაიდინა, რის გამოც პოლიცია მისი პიროვნებით დაინტერესდა. გარდა ამისა, ფრანგული სპეცსამსახურები მისი რადიკალური მოსაზრებების შესახებ ინფორმაციას ფლობდნენ. გამოძიება მიიჩნევს, რომ ომარ მოსტეფამ რადიკალური ისლამის მომხრე 2010 წელს გახდა და სავარაუდოდ, გარკვეული პერიოდის განმავლობაში სირიაშიც იმყოფებოდა. ფრანგულმა პოლიციამ უკვე დააკავა ომარ მოსტეფას მამა და ძმა და მათ სახლში ჩხრეკა ჩაატარა. 

პოლიცია მოსახლეობას აფრთხილებს, რომ თუ ეჭვმიტანილს ნახავენ, მას არ მიუახლოვდნენ რადგან, ის საშიშროებას წარმოადგენს. სწორედ მის სახელზე იყო დაქირავებული ის ავტომობილი, რომლითაც ბარებზე თავდამსხმელი ტერორისტები გადაადგილდებოდნენ.

საერთო ჯამში კი ამჟამად დაკავებულია 7 ეჭვმიტანილი, რომლებიც შესაძლოა არაპირდაპირ კავშირში იყვნენ თავდასხმების სერიასთან. გავრცელებული ინფორმაციით, მათ შორისაა სალეჰ აბდესლამის ერთ-ერთი ძმა. მესამე მათგანი კი ტერაქტების დროს დაიღუპა.