აჭარაში ტურისტულ ობიექტებს ახალ მიმზიდველობას შესძენს სტატუსი „რეკომენდებულია აჭარის ტურიზმისა და კურორტების დეპარტამენტის მიერ.“

აჭარის ტურიზმის დეპარტამენტის თავმჯდომარე მამუკა ბერძენიშვილი განმარტავს, რომ უწყების მიერ შემუშავდა გარკვეული სტანდარტები და მისი დაკმაყოფილების შემთხვევაში ობიექტი დეპარტამენტიდან შესაბამის სტატუსს მიიღებს.

პროექტში ჩართვა ნებისმიერი ობიექტისათვის ნებაყოფლობითია. შემუშავებული სტანდარტები აღებული ევროპული გამოცდილების გათვალისწინებით. შემუშავებული კრიტერიუმები განსაზღვრულია სამ მიმართულებად: აუცილებელი, დამატებითი და სასურველი კრიტერიუმები, რომლებშიც წარმოდგენილი თემატიკა იყოფა შემდეგ საკითხებად: უსაფრთხოება, ტექნიკური ნაწილი, დაჯავშნა, ინტერიერის შესაბამისობის სტანდარი, ანგარიშსწორება, მენეჯმენტი.

თითოეულ კრიტერიუმს აქვს შესაბამისი ქულა, რომელთა დაჯამებითაც გამოიკვეთება შესაბამისი პროცენტული მაჩვენებელი, რომლის მიხედვითაც ობიექტს მიენიჭება ან არ მიენიჭება სტატუსი – „რეკომენდებულია ტურიზმის და კურორტების დეპარტამენტის მიერ“  ყველა ობიექტს ექნება გონივრული ვადა, რომლის მიხედვითაც მათ შეეძლებათ გამოვლენილი გამოსწორებადი ნაკლოვანებების აღმოფხვრა.

„ვგეგმავთ, რომ პროგრამა იანვრიდან დავიწყოთ და ის გულისხმობს მინიმალური სტანდარტების შემოღებას და მათი დაკმაყოფილების შემთხვევაში, ობიექტებს ექნებათ საშუალება შესაბამისი სტატუსი მიიღონ. ეს ობიექტები შემდგომ ჩვენს მიერ ჩართული იქნებან, ონლაინ სივრცისა, თუ სხვადასხვა ტიპის სარეკლამო კამპანიაში, რომელსაც ჩვენ ადგილობრივ თუ საზღვარგარეთის ბაზრებზე ვაწარმოებთ“, – აცხადებს მამუკა ბერძენიშვილი.

პროექტის მონიტორინგის ჯგუფი დაკომპლექტებული იქნება ტურიზმის დეპარტამენტის თანამშრომლებით, მონიტორინგის პროცესში ასევე ჩართული იქნება გერმანიის ფედერაციული რესპუბლიკიდან მოწვეული ტურიზმის სფეროს ექსპერტი ულრიხ ტროსიენი. პროექტს ასევე ეყოლება აღმასრულებელი საბჭო, რომელთა შემადგენლობაშიც შევლენ აჭარის ტურიზმის და კურორტების დეპარტამენტთან არსებული აჭარის ტურიზმის მრჩეველთა რეგიონული საბჭოს წევრები.

აღნიშნული პროექტი გულისხმობს სხვადასხვა სახელმწიფო უწყებების ჩართულობასაც, პროექტის ფარგლებში გაფორმდება ურთიერთანამშრომლობების მემორანდუმები ბათუმი მერიასთან, სურსათის უვნებლობის სააგენტოსთან, შინაგან საქმეთა სამინისტროს გადაუდებელ დახმარებათა სამსახურთან, ბათუმის უნივერსიტეტთან და სხვ.

აჭარის ტურიზმის დეპარტამენტის ხელმძღვანელის თქმითვე, ეს ერთის მხრივ ობიექტების  ცნობადობას, ხოლო მეორეს მხრივ ტურისტებში ამ ობიექტების ნდობას გაზრდის. პროექტის მნიშვნელოვანი ფაქტორია ასევე ბაზარზე არსებული კონკურენციის ზრდა.