ბათუმში გაუარესებული მეტეოროლოგიური პირობების გამო დილიდან, ბათუმის ვიცე-მერმა 2 საგანგებო თათბირი გამართა. ბაგრატ მანველიძე მერიის სტრუქტურული ერთეულების ხელმძღვანელებსა და ადმინისტრაციულ ერთეულებში მერის წარმომადგენლებს შეხვდა და ქალაქში არსებული მდგომარეობის შესახებ ანგარიში მოისმინა.
მერიის ინფორმაციით, ბათუმში მოსულ უხვ ნალექსა და ძლიერ ქარს ქალაქისთვის მნიშვნელოვანი ზიანი არ მიუყენებია. მთელი ღამის განმავლობაში, საგანგებო რეჟიმში მუშაობდნენ მერიის შესაბამისი სამსახურები.

ერთდროულად მოსულმა უხვმა ნალექმა პრობლემები შექმნა რიგ ქუჩებზე, სადაც მდგომარეობა სწრაფადვე გამოსწორდა. ყველა სანიაღვრე არხი მუშაობდა სრული დატვირთვით. საგანგებო სიტუაციათა მართვის სამსახურში დაფიქსირდა 35 გამოძახება. ყველა გამოძახებაზე მოხდა დროული რეაგირება. შპს ,,ბათუმის წყლის“ ცხელ ხაზზე გამოძახება არ დაფიქსირებულა.

შტორმის გამო იკეტებოდა ზღვაში გამსვლელი არხები, სადაც 24 საათიან რეჟიმში მუშაობდა სპეციალური ტექნიკა. ამჟამად ყველა არხი გაწმენდილია.

უკვე გასუფთავებულია შტორმის გამო დანაგვიანებული ზღვის სანაპირო ზოლი.
ძლიერმა ქარმა ქალაქის ტერიტორიაზე 10-მდე ხე წააქცია. მახინჯაურში ხის წაქცევამ დროებით შეაფერხა მოძრაობა ქობულეთი-ბათუმის საავტომობილო მაგისტრალზე. დაზიანდა რამდენიმე სახლის სახურავი.
ამ დროისთვის ქალაქის 13-ვე ადმინისტრაციულ ერთეულში სტაბულური მდგომარეობაა.