ამ დრომდე უცნობია, თუ რა ბედი ეწია კონგოელი ამბოხებულების ტყვეობაში ჩავარდნილ ქართველ მფრინავს. საზოგადოებრივის ინფორმაციით,  სამხრეთ აფრიკაში საქართველოს ელჩი ბექა დვალი აცხადებს, რომ საგარეო საქმეთა სამინისტრო ინფორმაციის გადამოწმების მიზნით ყველა შესაძლო დიპლომატიურ რესურსს იყენებს, მათ შორის უწყება კომუნიკაციაშია გაეროსთან, „წითელ ჯვართან“ და კონგოს დემოკრატიული რესპუბლიკის შესაბამის უწყებებთან. 

საგარეო საქმეთა სამინისტროში 24 მაისს გამართულ ბრიფინგზე ითქვა, რომ ქართველი მფრინავი დიდი ალბათობით დაიღუპა, ელჩი განმარტავს, რომ აღნიშნული ინფორმაცია იმ დაჯგუფებისგან მიიღეს, რომლის დაქვემდებარებაშიც იყო სოსო ოსორაული. 

ბექა დვალი აცხადებს, რომ სოციალური ქსელში გავრცელებული ვიდეომასალები ძველია და ის რამდენიმე თვის წინ არის ჩაწერილი. 

ქართველი მფრივანის ვიდეო-გზავნილი ტელეკომპანია იბერიამ გუშინ გაავრცელა. როგორც ოსურაული მიმართვაში აღნიშნავს, მას ადამიანების დახოცვაში ადანაშაულებენ, თუმცა ეს სიმართლეს არ შეესაბამება. “დედა არ ინერვიულო, ყველაფერი კარგად იქნება, ძალიან მიყვარხართ, გემშვიდობებით, აბა კარგად”-ამ სიტყვებით მიმართავს კონგოში ტყვედ ჩავარდნილი ქართველი მფრინავი სოსო ოსურაული ოჯახის წევრებს. "რომ ამბობენ ჩემზე ვიღაცეები ჩახოცაო მასე არ არის, არ დაიჯეროთ, გთხოვთ არ დაიჯეროთ მე არავინ ჩამიხოცავს,დედა არ ინერვიულო, კარგი ბალღები დაზარდეთ, კარგად გაზარდეთ ჩემი შვილები, ძალიან მიყვარხართ", - ამბობს სოსო ოსურაული მიმართვაში.

მფრინავი სოსო ოსურაული საქართველოს შეიარაღებული ძალებიდან წასვლის შემდეგ კონგოს სამხედრო-საჰაერო ძალებში მსახურობდა. შვეულმფრენი, რომელსაც საქართველოს მოქალაქე მართავდა, ამბოხებულმა ძალებმა 27 იანვარს ჩამოაგდეს და რამდენიმე მძევალი აიყვანეს.