გამოცდილების გაზიარების მიზნით საქართველოს ფინანსური მონიტორინგის სამსახურს თურქმენეთის დელეგაცია ეწვია
2-4 ნოემბერს, საქართველოს ფინანსური მონიტორინგის სამსახურს თურქმენეთის დელეგაცია ეწვია, რომლის შემადგენლობაშიც არიან თურქმენეთის ფინანსური მონიტორინგის სამსახურის, ცენტრალური ბანკის, შინაგან საქმეთა სამინისტროსა და გენერალური პროკურატურის წარმომადგენლები. ვიზიტი თურქმენეთში ეუთო-ს ოფისის ორგანიზებით მოეწყო და მიზნად ისახავს საქართველოს ფინანსური მონიტორინგის სამსახურის მიერ თურქმენი კოლეგებისთვის უკანონო შემოსავლის ლეგალიზაციისა და ტერორიზმის დაფინანსების პრევენციის სფეროში გამოცდილების გაზიარებას.
კორუფციის წინააღმდეგ საქართველოში გატარებული რეფორმების გაცნობის მიზნით შეხვედრები გაიმართება აგრეთვე საქართველოს იუსტიციის სამინისტროში. ვიზიტის ფარგლებში დელეგაციის წევრები ეწვევიან თბილისის იუსტიციის სახლს, საქართველოს ეროვნულ ბანკს, შემოსავლების სამსახურს, საჯარო სამსახურის ბიუროსა და საქართველოს მთავარ პროკურატურას. საქართველოს ფინანსური მონიტორინგის სამსახური, რომლის ძირითად მიზანს უკანონო შემოსავლის ლეგალიზაციის აღკვეთისა და ტერორიზმის დაფინანსების წინააღმდეგ ბრძოლის ხელშეწყობა წარმოადგენს, აქტიურად თანამშრომლობს კანონით განსაზღვრულ მონიტორინგის განმახორციელებელ პირებთან, მათ საზედამხედველო ორგანოებსა და ფულის გათეთრებისა და ტერორიზმის დაფინანსების წინააღმდეგ ბრძოლის სფეროში მოქმედ საერთაშორისო ორგანიზაციებთან, აგრეთვე, სხვადასხვა ქვეყნის ანალოგიურ სამსახურებთან.
